Szkolne Dzieciństwo

Jak jo chodźoł do szkoły                                    
boły tys tam rechtory,
boły belfry, chopcy, frelki
I jo tys boł-gamoń wielki.

Śpiywać nigdy żech niy umioł
bo słoń nadep mi na ucho,
spulać byś sie mog ze smiechu
jakbyś trocha mie posuchoł.

Boł tys belfer łod muzyki
łazioł i dokładnie suchoł,
jakś fałszuwoł jak sierota
waloł smyckym w guche ucho!

Dziołchy miały fajne kragle
na drucikach hekluwane,
zawsze cyste i bieluśke
bo na kneflach przypinane.

Biza miołech na galotach
gorol „kancik” jon nazywoł,
ważny bołech jak sztajfiera
boch frajera na wsi zgrywoł.

W tasi miołech zawsze wyndka
bo co na wagarach robić,
Na „zuroku” i „cegielni”
chciołech coś na glizda złowić,

Fusbal grali my na straży
w trampkach abo po bosoku,
trzeba boło je szanuwać
bo je ros dostołeś w roku.

Fusbal z skory, taki z blazom
mioł na straży ino Acik
nawet Lyjo niem nie zagroł
choć to boł rodzony bracik.

Dugo mog bych tu łosprawiać
i pociskać ludziom fleki
ale tinty jus brakuje
wiąc jak skońca bydzie lepi